ආදරණිය ගැමුණු මල්ලී

ආදරණිය ගැමුණු මල්ලී

ලියුම ලැබුනා මට
ඒ ගැනට ස්තුතියි
ඇගි නෝනාට වියදමට
දුන් මුදල් අම්මගේ
එකවුන්ට් එකෙන් අරගන්න්
අම්මටත් ඒක මන්
කියාලයි තියෙන්නේ

අහපු එක නම් ඇගීගේ
කෙල්ල ගැන ගෙදරට වැඩට
එච්චරම හොඳ දෙයක්
කියා මම හිතන් නෑ
අම්මාත් කිව්වා
‘ඒකි මහ ඩිඟිස්සක්
කට හැකර කෙල්ලක්’

මම ගෙදර ගිය වෙලෙත්
අම්මාව ගෙන එන්න
සිරිපාල අයියත්
කිව්වෙ ඔය ටික තමයි

ඒ කාලෙ වගේ නෑ
අපේ ගම් හරි වෙනස්
ඩුබයි සවුදි ගිය උන්
අර සිරිත් වනසලා
කොල්ලො කෙල්ලෝ අතේ
අපමණට සල්ලි දැන්
උන් කරන විකාරයි
වසංගත මෝස්තරයි
මුළු ගමම විනාසයි

ඒ කෙල්ල ඉස්කෝලෙ යනවා උනත්
දැනටමත් ඉන්නවළු කොල්ලෙකුත්
ඔය වගේ උන් ගෙනත්‍
කොළඹ සවුදම් නටයි
ඒ නිසා ඔය වැඩේ නතර වුනු එක හොඳයි

ඕන නම් වැඩට ළමයෙක්
කතාකර විජේදාසට
හොයාගන්න තේ
වත්තකින් කෙල්ලෙක්
දෙමළ උන් උනත් උන්
කරන් නෑ විසිකිත්ත
වැඩ අපේ උන් වගේ

මොකද අර දේවිකා
කිව්වාය කියන්නේ
අම්මාව ගෙනාවේ
කුමුදු ගේ බැල මෙහෙට
අත් උදව්වට කියා

කුමුදු ගේ යාළුවෙක්
බැංකුවේ කතාවක්
එවලා ‘ඊ මේල්’
මෙහෙ ටිකක් ගිණි පුපුරු
කුමුදු කලිනුත් කිව්ව
ඔය කතා හැදෙන වග
අම්මාව ගෙනාවොත්

ඔයා එපා කතාවෙන්න
දේවිකා එක්ක මේ ගැන
ඔයාගෙ පවුලෙ සමාදානේ
රකින්න ඕනෑ සේරටම පෙර

අම්මාත් දෙවෙනි නෑ
හවස් වෙන කොට ගිහින්
බණ පොතත් පෙරලගෙන
කියවනව මහ හඞින්
කුමුදුටයි ළමයින්ටයි
රුස්සන්නෙ නෑ නේ
මේ වගේ ගමේ වැඩ
ඒ නිසා මෙහෙත් ටිකක්
රත්වෙලා කතා බහ

කුමුදු ගේ නෝක්කඩු
කණ වැදී අම්මගේ
දෙතුන් පාරක් දවසකට
කොළඹ ඉස්කෝල ගැන
ඇහෙනවා ඇනුම් පද

ගෙදර අඹ පොල් පුවක්
මී හරක් වී පෙට්ටි
හොරා කනවා ඇතිලු
ගමේ උන් නිදහසේ
මටත් ඉඳ හිට හෙමින්
ව‍චනයක් දෙකක් එයි

මටත් නම් හිතෙන්නේ
අම්මාට මෙහේ වැඩ
එච්චරම හරිත් නෑ
එයාගේ වගේ අය මෙහේ
කතා කර කර ඉන්නවත්
ඒ තරමකට නෑ

ඉන්න වයසක ලංකාවෙ අය
හොඳටම මෙහෙට හැදිලා
අම්මාට අල්ලන්නෙ නෑ
ගෑණු කලිසම් අඳිනවා
ළමයි මෙන් උඩ පැන නටනවා

හිතුවාට අපි සැපයි කියලා
අම්මාට නෑනේ
හිතෙන්නේ එහේමම
ඒ ගොල්ල ගේ අදහස්
අපට හරියන්නෙ නෑ
අපේ මේ ‘ඩෙවිනිෂන්’
ඒ අයට තේරෙන්නෙ නෑ

ලකීලා ගිය මාසෙ
ලංකාවෙ ගිහිල්ලා
එයාලගෙ අම්මාව
නිවාසෙක නවතලා
‘ඩිපොසිට්’ එකක් දුන්නාම
නි‍වසෙ අය බලනවා
කිසිම කරදරයක් නැහැළු
දෙපැත්තම හිතුවාම
මටත් හිතුනා ඒක
හොඳ වැඩක් කියලා

පුංචි පරහකට තියෙන්නේ
අම්මගේ ඉඩම් වතු
වෙල් කුඹුරු ගැන තියන
අසීමිත ආසාව
එව්ව දාලානම්
යයි කියා හෝම් එකකට
මට නම් හිතෙන්නෙම නෑ

ඒත් තනියම එයා
ගෙදර ඉන්න ඇරලා
අපි‍ කොහොමද මෙහේ
සැනසුමෙන් හිඳින්නේ
හදිසියේ මොනවත් උනොත්
කව්ද අම්මව බලන්නේ

අන්තිමේ අපටමයි
රටේ මිනිස්සුන්ගෙන්
අහන්නට වෙන්නේ කතාවල්
දැන් හොඳට හිටියාට
අපේම ඔය ලඟම නෑයෝ
කතා කරන හැටි බලතෑකි
එහෙම මොකවත් උ‍නොත්

මේව ගැන එපා
කියන්නට දේවිකාට නම්
එයා ආයෙත් හිතයි
කුමුදු මට කියාලා
අම්මාව පැන්නුවැයි

අම්ම අපි දෙන්නාව
හැදුවනේ ආදරෙන්
ඒ නිසා මල්ලි අපි
බලන්නට ඕනෙ එයාවත්
ඒ උනත් ඒක අපෙ
පවුල් වල සමාදානේ
ති‍යාගෙන කරන්නත් ඕන

මේ ගැන හොඳට හිතලා
ලියා එවන්න පිලිතුරක්
පොඩ්ඩි ඉල්ලපු කතා පොත්
දෙකක් විතරයි ලැබුණෙ
ඒවාත් එවනවා
මේ ලියම එක්කලා

මතකද ඔයාට අපෙ
ක්‍රිකට් ටීම් එකෙ හිටිය
‘කනකොට’ පීරිස්
මේ ලියුම අරන් එන
උපාලී උගෙ මල්ලි
මෙහෙ ඇවිත් හරි ජයයි
මටත් හමුව‍ුණේ අහම්බෙන්
එයාගෙත් ‍‍ෆීල්ඩ් එක
ඔයා කල ඉලෙක්ට්‍රිකල්
කතා කරලා බලන්න
මටත් නම් හිතෙන්නේ
එන එක මෙහේ ඔයාටත්
ඇඟට ගුණ දෙයක්යැයි
දේවිකාටත් හොඳයි
ළමයින්ට විසේසෙන්
ඊට වැඩියෙන් මුකුත්
ඒ ගැනට ලියන් නෑ
ඔයාගේ පරණ දේශනා
ආයෙමත් නම් එපා
අයිය හැටියට හිතල
ඔය ටිකත් ලිව්වෙ මං

මේ ලියුම නම් ගෙදර
ගෙනියන්නවත් එපා
හදිසියෙන්වත් එහෙම
දැක්කොතින් දේවිකා
අපි දෙන්න ආයෙමත්
තවත් මහ අවුලකයි

නවත්තමි ලිව් නිසා දිගට සෑහෙන්න
පතාගෙන මල්ලීට සම්මා සමබුදු සරණ

දයාබර අයියා,

නිමල්

ගෞරවනීය ලොකු හාමිනේ වෙතයි

හාමිනේ මට එවපු ලියුම ලැබිලා දැනට
මාසයක් හමාරක් ගෙවිලත් ඉවර ඇති
ඒ උනත් අදයි මට
අතට ඉවරයක් ලැබුණෙ
නිවාඩුව පාඩුවේ
උත්තරේ ලියන්නට
මගේ මේ පම‍ාවට
සමාවෙන්නැයි කියා
හාමිනේගේ දෙපා
නැමැද මම ලියනවා

ඉතින් ලොකු හාමිනේ
අපූරුයි විස්තරේ
ලස්සණයි මුද්දරෙත්
බොහොමටම ස්තුතියි
කියවලා බැළුවාම
මටත් එන්නට හිතයි
දැකගන්න ජීවිතේ
ඔය රටේ උදවියගෙ
සේරමත් හරි නෝනො
උයනවයි කියන හැටි
තමා අදහන්න බැරි
අනේ ඇත්තට නෝනො
කෑ හැකිද ඔය කෑම....?

මට මෙහේ බයේ බැහැ
හාමි‍ෙන් ලෙඩ වෙයිද ඔය
අනන් මනන් ජාති
කාල බීලා කියල
අපේ එක්කෙනාටත්
සැකයි මේ ගැන අහල
අනේ මගෙ හාමිනේ
නොකීවට දන්නවනෙ
සෙම ඇවිස්සෙන ජාති...?
ඒ ‍වගෙම පැණි රහත්
නොකන තරමට හොඳයි
ඔහෙදි ලෙඩ උනොත් හෙම
මම නැහැනෙ ලඟකවත්
ඒ නිසා පරෙස්සම්
වෙන්ඩ මගෙ හාමිනේ

නෝන බය වෙන්නෙපා
පහල වෙල වැඩේ ගැන
දැනටමත් දනියෙලා
හතර පස් සැරයක්ම
මෙහෙ ඇවිත් මා එක්ක
පොරොන්දුවෙ හැටියටම
අත්තමට කරන වග
දිවුරලයි තියෙන්නේ
ලොකු කොළූ මොක උනත්
දනියෙලා හොඳ එකා
වලව්වට ලෙන්ගතුයි
මගෙ බහට කීකරුයි
එදා වාගෙම තවම

හාමිනේ කිව්ව ‍වගෙ
කොස් ටිකක් පැණි දමන්
ගියා මම බණ්ඩ සාජන්
මහතුන්ගෙ ගෙදරටත්
හොඳ වෙලාවට මමත්
ඒක අරගෙන ගියේ
මොකද ඒ නෝනටත්
හොඳට දොල දුක් ගාය
අපරාදෙ කියන්න බෑ
සිරියාව වැගිරෙනව
අනේ වාසනාවන්

සියක් වර පින් දුන්න
පැණි කොස්ම ගෙනිච්චට
කන්න හරි ආසාව
තිබිල තියෙනව හිතේ
හාල් මැස්සොයි බටුයි
තෙල් දාල මිරිසකට
පෙ‍ාලොස් ඇඹුලකුයි පොල්
සම්බෝලෙකුයි එක්ක
බත් කන්න ආසයිලු
කියනවා හොරෙන් වගෙ
ලඟකදිම බත් මුලක්
හදාගෙන ආයෙමත්
එහෙ යන්න හිතනවා
හාමිනේ හිටියනං
කරන වැඩ නේ ඕව
‍
හපෝ හප්පච්චියේ
ජානිස්ගෙ කෙල්ලො නම්
මාර දූවරු තමයි
හනස්සක් ඇට්ටියක්
වැටෙන සද්දක් ඇද්ද
තුන් දෙනා එතන ඇති
මමත් නම් ඇරියෙ නෑ
ඔරවලා ගොරවලා සද්දයක් දැම්මාම
උස්සලා පස්සවල් ගස්සලා දුවනහැටි
බලන්නම වටිනවා
පොඩි බඩ්ඩ තමා වැඩි
පොත්තෙ රත වාගෙමයි
කට ඩිංග ඇරියමත්
කොච්චි කරලට එහා
ඒකටම ගැලපෙන්ඩ
නමින් නම් සවුම්යා
අනේ මගෙ කට මෙ‍ාටද
හැබැයි හරි හැඩකාරි
කොරටුවේ ගෙදර අර
නාමලුත් ඒ කාලෙ
බල බලා උන්නලුනෙ
මේකි ගැන හිත වැටිල
කන්ද පාවුල ගෙදර
නිලුපුලුත් ගම ඇවිත්
ඉස්කෝලෙ නිවාඩුනෙ
මේ ටිකේ කුඹුරු වැඩ
සීදේවි කොළු පැටිය

ලයිට් නං නිවනවා
වැඩිය රෑ වෙන්ඩ පෙර
කොහොමටත් මම කැමති
ලාම්පුවෙ එළියටනෙ
දමයන්ති මගෙ කෙල්ල
ආව දවසක් දෙකක්
ටෙලිවිසන් බලන්නනෙ
ආසයි දන්නැද්ද
ඒත් මම දුන්නෙ නෑ
පැය බාගෙකට වඩා
මොකද ඕකට උණත්
ලයිටි බිල් නගිනවනෙ

මගෙ දරුව උනත් මම
හාමිනෙට කියන්නේ
ඒකි හරි කටකාරි
මොන නැකතකින් උපන්
එකියක්ද කියලා
මගෙන් මම අහගත්තු
ව‍ාර කොච්චර ඇද්ද

ගැමුණු හාමුලෑ දිහා
යන්න කිව් වෙලාවේ
පෑව ආඩම්බරේ නම්

ඒකිගේ කටින් කී
කතා ටික ඇහුව නං
හාමිනේ මගෙ මූණ
ඇහැ ගහන එකක් නෑ
පොඩි එකා නං ඔහේ
හන්දියේ කඩේමයි
බයිල කිය කියා පොඩි
ඩෝලෙකුත් ගහනවළු
තාම පොඩි එකා නොවැ

ඉතින් ලොකු හාමිනේ
දැන් ගොඩක් ලිව්ව නොවැ
අපි මෙහේ සනීපෙන්
හොඳින් කල් ගෙවනවා
වලව්වයි ගෙවත්තයි
අනික් හැම දෙයක්මයි
අපි හොඳින් බලන වග
හොයන වග දන්න‍වනෙ
හාමිනේ ඒව ගැන සංකාව ගන්නෙපා
නිවාඩුව පාඩුවේ හිතේ සතුටෙන් ‍ඉන්න
ගැමුණු හාමුත් නිතර
මට කතා කරනවා
දුක සැපත් අහනවා
හාමිනේටත් නිමල්
හාමුටත් නෝනටත්
දරු පැටව් දෙන්නටත්
පතමි සම්බුදු සරණ

මේ වගට
සදාලැදි

ඇගි නෝනාය.

(නිලුපුල්)

රන්කැටේ මගේම නාමල්....!

හරි නරක ළමයා ඔයා
බැළුවෙ නෑ නිකංවත්
ඇයි අනේ ඔච්චරම
බයද අපෙ තාත්තට

නිවාඩු දුන් ද‍වසෙ නම්
කිව්වෙ ලොකුවට කයිය
කාටවත් බය නැතිය
හිතුනොතින් එනවාය
රෑට අපෙ ගෙදරටත්

ආදරේටයි කිව්වෙ
නොරොක් කර ගන්නෙපා
හිත ඉතින් හොඳ ළමයො
දන්නවනෙ දමයන්ති
ඔයාගෙම මැණිකනේ

අම්මාට මහගෙදර
ලැබිල සින්නක්කරම
ලොකු හාමිනේලා
වැඩලා ඇමරිකාවේ
කුෂන් පුටු වල ඉන්නෙ
උඩ තියන් කකුල් දෙක
කුස්සියේ බංකුවේ
බැඳෙනවා මකුළු දැල්

ගෙදර එන්නෙවත් නෑ
ලොකු හාමිනේගෙන්
රජ අණක් ලැබුනාලු
සිකුරාද හවස නම්
තාත්තත් පරක්කුයි
රස්තියාදුවෙ යද්දි
ඔය ළමය ගම වටේ
හැන්දෑවෙ මේ පැත්ත
ටිකක් බලලා යන්න

හරිම පම්පෝරි දැන්
අම්මගේ කරච්චල්
ලියුමකුත් එව්වාලු
ලස්සණලු මුද්දරේ
පුසුඹයිලු කවරෙ හිට
අපේ ගෙදරත් ඉතින්
ඇමරිකන් වරුණෙමයි

අම්මටත් දැන් අපේ
එහෙ යන්න හිතිලා
කුස්සියේ වැඩ කරන
හැටි එහෙම අහලා
පොල්ගෑම් පිටි කෙටුම්
මිරිස් ඇඹරිලි නැහැලු
හැම දේම බෝතලෙන්
දාන්නට තියෙනවළු

පිඟන් හෝදන්නෙත් නෑළු
අත් දෙකෙන් අල්ලලා
රෙදි පෙරෙදි හෝදන්න
මෙහෙත් තියෙනවනෙ මැෂින්

ළමයි කිරි පාටයිලු
හැඩ වැඩලු ලස්සණලු
අපිට නම් බැරි වෙයිලු
යන්න ඒවල එහෙම
සවුදි යන උන් වගෙද
ඇමරික‍ාවට යන්ඩ
උගත්කම ඕනෙයිලු

මෙහෙට එන සුද්දො නම්
ටිකක් රතු පාටයිනෙ
හාමිනේ නාකි ඇස්
වලින්නේ බලන්නේ
ගන්නවැයි හරි හමන්
කණ්නාඩියක් වත්
කුණු කමට උන්දැගේ
අම්මාත් අපේ දැන්
ලොකු හාමිනේමයි
පය ගහන්නෙත් ටිකක්
ගම්බීර විදිහටයි
යතුරු ටික ඉණ ගහන්
තියන් නෑ බිම හේම
පිම්බුවට දැන් මෙහෙම
ආපුවම බලතෑකි
බහින හැටි ඔය හුලං

පින්තූරෙකුත් තිබුණ
නිමල් මහත්තයාගේ
ලොකු හාමු ‍වගේමයි
කිය කියා බල බලා
පුංචි කාලේ එයා
කරපු වැඩ කියනවා

වෙලාවකට මට
හිතට තරහයි දුකයි
මටයි මල්ලිටයි වඩා
අම්මටත් හරි ලොකුයි
මහගෙදර ඔය ළමයි

පුංචි කාලෙත් ඉතින්
අපිට ලුණු කැඳ තමයි
මහ ගෙදර අයට නම්
උයල දෙයි බත් මාළු
වෑංජන අච්චාරු

ළමයි ටික ලොකු වෙලා
ගියායින් පස්සෙ නම්
හාමිනේ තරමක් හොඳයි
කෑම වේලක් දෙකක්
දෙන්න හෙම ලෝබ නෑ

ඒ අස්සෙ තව එකක්
කොළඹ ඉන්නා පුතා
ගැමුණු මහත්තය අහ
මට එන්න කියලා
අම්මාට කියාලා

තාත්තා ගොරවලා
බැනලායි නැවතුනේ
අම්මගේ කට ටිකක්
ඒ ගෙදර වරුණෙ මයි
රට යන්නටත් ලැබෙයි
උඹ ගෙදර ඉන්නෙ දැන්
එනව‍ාද අහනවා
අස්ස කරත්තෙන් එකෙක්

මටත් තරහයි හොඳට
කෑ ගහල අඬාලා
කිව්ව මං පනිනවැයි
වෙල ගාව මහ ලිඳට
ආයෙ මට කි‍ව්වොතින්
ගෙවල් වල වාල් වැඩ

හිතට ගන්නෙපා වැඩිය
කිව්වට අම්මා ඔහොම
මට හරිම ආදරෙයි
අම්මටත් ඉකි ගැහුණ
මම එහෙම කිව්වාම

අනේ නාමල් ඔයා
කොහොම හරි කරල
විභාගෙට ලියන්නකො
දක්ෂයිනෙ ඔයා මට
වඩා පාඩම් වැඩට

කවද හරි ඔයා ලොකු
තනතුරක ඉන්නවා
දකින්නයි මට ඕන
මගෙ ළමය දමයන්ති
කියන දේ අහනවනෙ

ආයෙ මට කුසුම් ලගෙ
ගෙදර එන්නට වෙන්නෙ
පොලදාට එන සතියෙ
මටත් ලියුමක් ඕන
ඇ‍‍ෙ‍ඬයි මට එදා වගෙ
ආයෙමත් නොලිව්වොත්
ඔන්න අමතක නොකර
ලියනවනෙ මගෙ කොල්ල

ඔයාගෙම බාලොලි මල

සදා ආදර

දම්මි

ඇගි නෝනා වෙතටයි

මෙහේ ආදාම මං
එවු ලියුම් කරදහිය
ලැබෙන්නැති මට තවම
පිලිතුරක් ලැබුණෙ නෑ
පොඩි පුතා කොළඹ හිට
කතාකර කියාලා
ලොකු පුතා කිව්වා මට
උඹ හොඳින් ඇත කියා
ඒ උනත් ඇගි නෝනෙ
පරක්කුව ලැබුනාම
ලියාපන් පද ටිකක්
මටත් මෙහෙ කියවන්න.

මෙහේ මහ අමුතු වැඩ
කුස්සි කොළඹට එහා
මිරිස් තුන පහක් නෑ
අඹරන්න ගලක් නෑ
බෝතලේ හලනවා
සෝස් වක් කරනවා
පොල් බිඳක් දැක්කෙ නෑ
හිරමනේ වගක් නෑ
මිටි කිරක් දිය කිරක්
වෙන් කරන සිරිත් නෑ
ටින් එකෙන් හැම කිරක්
නැතිම නම් කුඩු පැකට්
ඔය තමයි මේ රටේ
හොදි හදන අපූරුව

පිටි හලන පිටි කොටන
හැටි මුකුත් මතක නෑ
ඇමරිකන් පිටි තමයි
ගුල්ලො නම් දැක්කෙ නෑ

පුංචි මුණුපුරාගේ පන්තියට මම ගියා
ළමයි එක එක හැඩයි පාටවල් අපූරුයි
සමහරුන් සුදුම සුදු කඳන් පණුවන් වගේ
කළු අයත් ඉන්නවා ගල් අඟුරු පරාදයි
ඒ උනත්‍ පොඩි පැටව් කාගෙමුත් දරුවො නොවැ
එහෙම හිතුවාම නම් සේරමත් එක වගේ

දනියෙල්ට මේ සැරෙත් පහල වෙල අත්තමට
දෙන්න වචනය දුන්න
ඒ පැත්තෙ ඇවිදලා හොයල බලපන් ටිකක්
දනිය නම් හොඳ එකා ඒත් උගෙ ලොකු කොළූ
ටිකක් ගානට වැඩියි කතා බහ මහ වසයි
ගිය සැරේ කමතෙදිත් ලෝ එකෙන් මයි හිටියෙ

පුතාටත් මම කියල
ලියමනක් එවන්නම්
බණ්ඩ සාජන්ටම ලියල
කොස් ටිකක් පැණි දාල
ගෙනියපන් එහෙ යද්දි
ඒ නෝන හරි ආස
කෑමක් නෙ පැණි කොස්

වත්ත හෙම බලාපන්
හොරු කඩයි පුවක් අඹ
දෙවට ලඟ අඹ පැලේ
බලා ගන්නම ඕන
ජානිස්ගෙ කෙල්ලො හෙම
ආවොතින් කට ගහන්
දෙකක් කියපන් හොඳින්
අතට පොල්ලක් අරන්
නැතුව උන් බය නෑනෙ
උඹට බැණ අඬ ගහයි

නිවාපන් ලයිටි හෙම
හුඟක් රෑ වෙන්ඩ පෙර
මේ ලියුම කියෝපන්
උදේකට ඉර එළියෙ
ඇස් නරක් වෙයි උඹෙත්
ලයිට් එළියෙන් මගේ
අත් අකුරු කියවලා
දැන් ලයිට් හරි ගණන්
මටත් අත මිට හිඟයි
පොඩි පුතා ආවාම
උඹට වියදමට දෙයි

ඉක්මනින් එනව මං
වැඩි කලක් ඉන්න බෑ
මේ රටේ ජීවිතේ
අපට අල්ලන්නෙ නෑ
ඒ උණත් ලොකු පුතා
සතුටෙනුයි දැන් ඉන්නෙ
අම්ම ඇවිදින් කියා
හැමෝටම කියනවා

ලේලි නරකමත් නෑ
කොහොමටත් එහෙමයිනෙ
ඕව ඇවිදින් කියමු
නොලිව්වට ලියමනේ

ඇගි නෝනෙ ආයෙමත්
ලියන කන් නවත්තමි
පුංචි හාමිනේවත්
මතක් කෙරුවයි කියන්
ඒපැත්තෙ උඹ ගියොත්
වැඩිවෙලා ලත නොවී
පණිවිඩය කියාලා
ඉක්මනින් ආපහු වරෙන්
ඉඳින් මගෙ ගේ බලන්

මීට
ලොකු හාමිනේ